चितवन, ३१ जेठ । चितवनमा डेङ्गु रोगको प्रकोप फैलने खतरा बढेको स्वास्थ्यकर्मीहरुले बताएका छन् । सन् २०१० मा नेपालमै पहिलोपटक डेङ्गुको महामारी फैलिएको थियो जसका कारण चितवनमा झन्डै दुई दर्जन व्यक्तिको ज्यान गएको थियो । अब यो साल या अर्का साल पनि यस्तै महामारी फैलनसक्ने  यो महामारीलाई नजिकबाट नियालेका भरतपुर अस्पतालका डा विजय पौडेलले बताउनुभएको छ । सबैसँग सावधानी रहन पनि उहाँले आग्रह गर्नुभएको छ । चितवनमा पछिल्लो १० महिनामा ६७ जनामा डेङ्गु रोगी फेला परेको र त्यसमध्ये एकजनाको ज्यान गएको जिल्ला जनस्वास्थ्य कार्यालयले आज एक तथ्याङ्क सार्वजनिक गर्दै जानकारी दिएको छ ।

तथ्याङ्कअनुसार मेनेन्जाइटिस रोगको समेत सङ्क्रमण रहेकी नवलपरासीकी एक  महिलाको भरतपुर अस्पतालमा उपचारका क्रममा ज्यान गएको हो । गत भदौ महिनादेखि जेठसम्मको तथ्याङ्क सार्वजनिक गर्दै जनस्वास्थ्य कार्यालय चितवनका भेक्टर कन्ट्रोल निरीक्षक राम केसीले १११ जनाको रगत परीक्षण गरिएकामा ६७ जनामा डेङ्गु फेला परेको जानकारी दिनुभयो । उहाँका अनुसार तीमध्ये चितवनका ४२ जना डेङ्गुका रोगी छन् । बाँकी नवलपरासी, तनहुँ, मकवानपुर र अन्य जिल्लाका रहेका छन् । चितवनमा यो सालको वैशाखमा एक र जेठमा तीनजनामा डेङ्गु रोगी फेला परेको कार्यालयले जनाएको छ । यसपटक गर्मी बढ्दै जान थालेको र पानी पनि पर्न थालेकाले डेङ्गु फैलनसक्ने भन्दै सावधानी अपनाउन जनस्वास्थ्यका प्रमुख केहरसिंह गोदारले सचेत गराउनुभएको छ ।