काठमाडौं, ३२ जेठ । नेदरल्याण्डको युरो कप फुटबल प्रतियोगितामा अघिल्लो चरणको प्रवेश कठीन बनेको छ । समूहचरणको पहिलो खेलमा डेनमार्कसँग पराजय बेहोरेको नेदरल्याण्डले बुधबार राती जर्मनीसँग भएको खेलमा पनि २-१ गोल अन्तरले पराजित भएसँगै अघिल्लो चरण प्रवेशको संभावना कठिन बनेको हो । समूह बी को अघिल्लो खेलमा पोर्चुगललाई हराएको जर्मनी ६ अंक सहित समूहको शीर्ष स्थानमा उक्लिएको छ । 
यता नेदरल्याण्डले भने प्रतियोगितामा कुनै पनि अंक जोड्न सकेको छैन । उसले अब अघिल्लो चरण प्रवेशका लागि पोर्चुगललाई फराकिलो अन्तरले पराजित गर्नु पर्नेछ । यस्तै जर्मनीले डेनमार्कमाथि जित हात पार्नु पर्नेछ । समूह बी मा नै रहेका डेनमार्क र पोर्चुगलको समान ३-३ अंक छ । गएरातीको खेलमा जर्मनीको जितमा मारियो गोमेजले २ गोल गरेका थिए । यस्तै नेदरल्याण्डका रोबिन भान पर्सीले सान्तवना एक गोल फर्काएका थिए । 
यसअघि प्रतियोगिता अन्तर्गत बुधबार राती भएको पहिलो खेलमा पोर्चुगलले डेनमार्कलाई ३-२ गोल अन्तरले पराजित गरेको छ । समूह चरणको अघिल्लो खेलमा जर्मनीसँग हार बेहोरेको पोर्चुगलले डेनमार्कमाथिको जितपछि अघिल्लो चरण प्रवेशको संभावना कायमै राखेको छ । खेलको २४ औं मिनेटमा पेपेको गोलमा अग्रता लिएको पोर्चुगलका लागि ३६ औं मिनेटमा हेल्डर पोस्टिगाले अर्को गोल थपेर अग्रता दोब्बर पारेका थिए । डेनमार्कका लागि ४१ औं र ८० औं मिनेटमा निकलास बेन्डनरले गोल गर्दै खेल बराबरीमा पुर्याए । खेल सकिन तीन मिनेट बाँकी छँदा ८७ औं मिनेटमा पोर्चुगलका सिल्भेस्टर भरेलाले गरेको गोल नै खेलको निर्णायक सावित भयो । 
प्रतियोगिता अन्तर्गत बिहीबारपनि २ वटा खेलहरु हुँदैछन् । बिहीबार राती पौने १० बजेपछि शुरु हुने पहिलो खेलमा इटाली र क्रोएशिया भिड्दैछन भने मध्यराती साढे १२ बजेपछि हुने दोश्रो खेलमा स्पेन र आयरल्याण्ड आमने सामने हुँदैछन् ।