काठमाडौं, १ असार । एकीकृत नेकपा माओबादीको संस्थापन पक्षले शुक्रबार राजधानीमा शक्तिप्रर्दशन सहित आमसभा गर्दैछ । पहिचान सहितको संघियता र संघियता सहितको सविधानमा जनमत सिर्जना गर्न माओबादीले शुक्रबार आमसभा गर्न लागेको हो । राजधानीको खुलामञ्चमा दिउँसो १ बजेपछि हुने आमसभालाई अध्यक्ष पुष्पकमल दाहाल, उपाध्यक्ष एवम् प्रधानमन्त्री डा. बाबुराम भट्राईले सम्बोधन गर्नु हुने कार्यक्रम रहेको छ । सभा सुरु हुनुअघि पार्टीको जनवर्गिय तथा भ्रातृ संगठनहरुले राजधानीको चाबहिल, कोटेश्वर, महाराजगञ्ज, कलंकी, सातदोबाटो, कालीमाटी, पुतलीसडक लगायतका स्थानबाट र्याली निकाल्ने माओबादीले जनाएको छ । सबिधानसभाबाट सबिधान बन्न नसक्नुको कारण बारेमा अध्यक्ष दाहालले स्पष्ट गर्नु हुने बताइएको छ । केहीदिन अघि खुलामञ्चमै कांग्रेस एमाले लगायतका बिपक्षी दलले सरकार र माओबादीबिरुद्ध शक्ति प्रर्दशन गर्न आमसभा गरेका थिए ।
यसैबीच, माओबादीको असन्तुष्ट बैद्य पक्षको केन्द्रिय समितिको बैठक शुक्रबार नै बस्दैछ  । वैठक नेवाः राज्यसमितिको कार्यालय कुपन्डोलमा विहान ११ बजेबाट शुरु हुने वैद्य पक्षिय केन्द्रीय सदस्य महेश्वर दाहालले जानकारी दिनुभयो । दाहालले अध्यक्ष पक्षले नीतिगत आधारमा नै आफुहरुका माग पुरा गर्न नसक्ने देखिएको भन्दै एकताको संभावना कम बन्दै गएको उल्लेख गर्नुभयो । वैठकमा शनिबारबाट सुरु हुने राष्ट्रिय कार्यकर्ता भेलामा प्रस्तुत गर्ने प्रतिबेदन तयार गरिने दाहालले वताउनुभयो । राजधानीको बौद्धस्थित शेर्पा समाजको हलमा हुने कार्यकर्ता भेलामा १५ सय राज्य समितिको सदस्यहरुको उपस्थित रहने बताइएको छ । भेलाले नयाँ पार्टी गठनको प्रस्ताब गर्ने बुझिएको छ । भेलाको तयारी पुरा भएको सो पक्षले जनाएको छ ।