काठमाडौं, ४ असार । जर्मनी र पोर्चुगल युरो कप फुटबल प्रतियोगिताको क्वाटर फाइनलमा प्रवेश गरेका छन् । आइतबार राती भएका खेलहरुमा विजयी हुँदै दुवै टिमहरु अघिल्लो चरण प्रवेश गरेका हुन् । आइतबार राती भएको खेलमा जर्मनीले डेनमार्कलाई २-१ गोल अन्तरले पराजित गरेको छ । जितसँगै जर्मनी अन्तिम आठमा पुगेको हो । जर्मनीलाई जित दिलाउँने क्रममा माइकल क्रोनले खेलको २४ औं तथा ८० औं मिनेटमा लार्स बेन्डरले ८० औं मिनेटमा गोल गरेका थिए । यस्तै डेनमार्कका तर्फबाट लुकास पोडोलस्कीेले खेलको १९ औं मिनेटमा सान्तवना गोल फर्काएका थिए । जर्मनीले अब क्वाटर फाइनलमा गृसको सामना गर्नेछ । पराजयसँगै डेनमार्क भने प्रतियोगिताबाट बाहिरिएको छ ।
यस्तै प्रतियोगिता अन्तर्गत आइतबार रातीनै भएको अर्को खेलमा पोर्चुगलले नेदरल्याण्डसलाई २-१ गोल अन्तरले नै पराजित गरेको छ । पोर्चुगलको जितमा कप्तान क्रिस्टियानो रोनाल्डोले २ गोल गरेका थिए । उनले खेलको २८ औं र ७४ औं मिनेटमा गोल गरेका थिए । राफेल भान डेर भार्टले खेलको ११ औं मिनेटमै पहिलो गोल गर्दै नेदरल्याण्डसलाई अग्रता दिलाएपनि त्यो जीतका लागि पर्याप्त भएन । पोर्चुगलले अब क्वाटर फाइनलमा चेक गणतन्त्रसँग प्रतिस्पर्धा गर्नेछ । नेदरल्याण्डस भने सबै खेलमा पराजित हुँदै प्रतियोगिताबाट बाहिरिएको छ ।  प्रतियोगिता अन्तर्गत सोमबारपनि दुईवटा खेलहरु हुँदैछन् । सोमबार हुने खेलमा क्रोएशिया र स्पेन तथा आयरल्याण्ड र इटाली भिड्नेछन् । दुवै खेल मध्यराती साढे १२ बजेपछि हुनेछन् ।