काठमाडौं, ५ असार । एकीकृत नेकपा माओबादीको संस्थापन पक्षसंग सम्वन्ध विच्छेदको घोषणा गरेको उपाध्यक्ष मोहन वैद्य किरण समुहले मंगलबार नयां पार्टीको औपचारिक घोषणा गर्दैछ । नयां पार्टीको घोषणा तथा आगामी कार्यदिशावारे जानकारी गराउन मंगलबार दिउंसो एक वजे राजधानीको कमलादीस्थित प्रज्ञा भवनमा पत्रकार सम्मेलनको आयोजना गर्न लागिएको स्थायी कमिटी सदस्य नेत्रविक्रम चन्द विप्लवले जानकारी दिनुभयो । वैद्य समूहको सोमबार राजधानीमा सम्पन्न राष्ट्रिय कार्यकर्ता भेलाले नयां पार्टीको नाम नेपाल कम्युनिष्ट पार्टी, माओबादी राख्ने प्रस्ताव पारित गरेको थियो । भेलाले वैद्यको नेतृत्वमा ४४ सदस्यीय केन्द्रीय समिति चयन पनि गरेको छ । महासचिवमा रामबहादुर थापा, सचिवमा सिपी गजुरेल, स्थायी समिति सदस्यमा नेत्रविक्रम चन्द र देव गुरुङ रहनुभएको छ । बांकी सदस्यको चयन पार्टीको आगामी केन्द्रीय समिति वैठकवाट गरिने विप्लवले जानकारी दिनुभयो । भेलाले ‘जनयुद्धको जगमा जनविद्रोह’ को कार्यदिशा पारित गरेको छ । पार्टीले पार्टी विभाजन भए पनि एकीकृत नेकपा माओवादीले अहिलेको संशोधनवादी कार्यदिशा परित्याग गरेमा एकताका लागि पहल जारी राख्ने निर्णयसमेत गरेको छ । यसैबीच, पार्टी विभाजनसंगै कोटेश्वरस्थित केन्द्रीय कार्यालय कसको रहने भन्ने अन्योल देखिउको छ । वैद्य पक्षमा लागेका उद्योग व्यापार संघका अध्यक्ष शिव कट्टेलको नाममा कोटेश्वरस्थित कार्यालय भएकाले उक्त कार्यालय वैद्य पक्षले लिन सक्ने वताइएको छ । पार्टी कार्यालय किन्दा एक सहकारीबाट लिएको एक करोड भन्दा बढी ऋण पनि कट्टेलकै नाममा छ ।