काठमाडौं, ८ असार । अर्थमन्त्री वर्षमान पुनले नयाँ आर्थिक बर्षको बजेट ल्याउँने बिषयमा शुक्रबार नेकपा एमाले अध्यक्ष झलनाथ खनालसँग परामर्श गर्नु भएको छ । डल्लुस्थित अध्यक्ष खनालको निवासमा शुक्रबार बिहान भएको भेटवार्तामा अर्थमन्त्री पुनले बजेट ल्याउन सरकारले गरिरहेको तयारीका बारेमा जानकारी गराउँदै सहयोग गर्न आग्रह गर्नु भएको थियो । झण्डै एक घण्टा सम्म चलेको उहाँहरुबीचको भेटमा मन्त्री पुनले शिर्ष तहमा सहमति निमार्णका लागी भूमिका निर्वाह गर्न समेत खनाललाई आग्रह गर्नु भएको अर्थमन्त्रीको नीजि सचिबालयले जनाएको छ । जवाफमा अध्यक्ष खनालले राष्ट्रिय सहमतिको सरकारले मात्र पूर्ण आकारको बजेट ल्याउँने भन्दै पूर्ण बजेटको तयारीमा नलाग्न अर्थमन्त्री पुनलाई सुझाव दिनुभएको थियो ।
यसअघि अर्थमन्त्री पुनले बिहीबार साँझ नेपाली कांग्रेसका सभापति सुशील कोइराला सँग भेट गरि सहयोग गर्न आग्रह गर्नु भएको थियो । सो अबसरमा कोइरालाले राजनीतिक दलहरुबीच सहमति गरेर मात्रै बजेट ल्याउन अर्थमन्त्री पुनलाई सुझाव दिनु भएको  थियो । बिपक्षी दलहरुकोसमेत सहमतिमा बजेट तयार गर्न अर्थमन्त्रीले कांग्रेस एमाले लगायत दलका आर्थिक बिज्ञहरु सम्मिलित एउटा छुट्टै बिज्ञहरुको  समुह निर्माण गर्न आफू तयार रहेको बताउदै आउनु भएको छ ।
राष्ट्रपतिले दलहरुसँग राजनीतिक सहमति कायम गरेर मात्र बजेट तयार गर्न निर्देशन दिएपछि अर्थमन्त्रीले बिहीबारबाट बिपक्षी दलका शिर्ष नेताहरुसँग परामर्शलाई तिब्रता दिनु भएको हो