काठमाडौं, ८ असार । नेपाली कांग्रेसका वरिष्ठ नेता शेरबहादुर देउवाले नयाँ संविधान लेखनका लागि राष्ट्रिय सहमतिको सरकार गठन गर्नाको विकल्प नभएको बताउनुभएको छ । लोकतान्त्रिक गैरसरकारी संस्था महासङ्घ फेडेनको राष्ट्रिय भेलाको आज यहाँ उद्घाटन गर्दै उहाँले मुलुकलाई चार वर्षसम्म पनि संविधानविहीनको अवस्थामा राखेको ठूलो दलको हैसियतमा रहेको एमाओवादीले पुनः संविधान बनाउने भन्दै आफूले नै नेतृत्व गर्ने भनाइ राख्नु औचित्यहीन हो भन्नुभयो । वरिष्ठ नेता देउवाले जनतासँग प्रत्यक्ष सम्बन्ध राख्ने सशक्त र प्रभावकारी माध्यम नै मुलुकका गैरसरकारी संस्था भएकाले अहिले सरकारभन्दा गैरसरकारी संस्था बलियो भएको स्थितिमा तिनलाई प्रभावकारी बनाउन आवश्यक भएको पनि बताउनुभयो ।
नेपाली कांग्रेसका केन्द्रीय सदस्य डा रामशरण महतले गैरसरकारी क्षेत्रलाई लोकतान्त्रिक पद्धति र विधिअनुसार सञ्चालन गर्नुपर्नेमा जोड दिनुभयो । उहाँले अहिले मुलुकमा विदेशी दातृ निकायले विभिन्न जातजातिको अनुसन्धान र विश्लेषण गर्ने नाममा जातजातिबीचमा फुटको राजनीति गर्ने परम्परालाई अगाडि बढाएकाले त्यसतर्फ चनाखो हुनुपर्ने बताउनुभयो । फेडेनका अध्यक्ष डा बालगोपाल वैद्यले गैरसरकारी संस्थाका कार्यक्रमको समीक्षा, भावी रणनीति निर्माण, गैरसरकारी संस्थाको सबलीकरण र अन्तर्राष्ट्रिय गैरसरकारी संस्थामार्फत जाने कार्यक्रमका बारेमा स्पष्ट कार्यदिशा तय गर्न भेलाको आयोजना गरिएको जानकारी दिनुभयो । कार्यक्रममा फेडेनका केन्द्रीय सदस्य रमेश धमला, तुलसालता अमात्य, अशोक योगीलगायतले तल्लो तहमा सेवा प्रवाह गर्ने अवस्था अहिले न्यून रहेको अवस्थामा पार्टीगतरुपमा गैरसरकारी संस्था सञ्चालन गर्न नहुनेमा जोड दिनुभएको थियो । भेलामा फेडेनअन्तर्गतका ६० भन्दा बढी जिल्लाका प्रतिनिधिको सहभागिता छ ।