सिरहा, २२ असार । विभिन्न तीनसूत्रीय माग राखी उद्योग वाणिज्य सङ्घ सिरहासँग आबद्ध व्यवसायीले लहानस्थित पूर्वपश्चिम राजमार्गमा दुई घन्टा धर्ना दिएका छन् । लहानस्थित होटल विशालका सञ्चालक र होटलमा वास बसेका पाहुनालाई समेत प्रहरीले कुटपिट गरेको आरोप लगाउँदै व्यवसायी आन्दोलित भएका छन् । राजमार्ग बन्द गराउन खोज्ने क्रममा बसमा ढुङ्गा हानेको भन्दै एक युवालाई प्रहरीले पक्राउ गरेको छ ।  होटलका सञ्चालक र वास बसेका पाहुनालाई कुटपिट गर्ने प्रहरीलाई निलम्बन गर्नुपर्ने, खोसिएको सुनको सिक्री र औँठी, रु पाँच लाख फिर्ता गर्नुपर्ने र घटनाको छानबिनका लागि उच्चस्तरीय छानबिन आयोग गठन गर्नुपर्ने व्यवसायीको माग छ । सङ्घको आवह्वानमा लहान बजार बिहीबारदेखि नै पूर्ण रूपमा बन्द छ  । माग पूरा नभएसम्म बजार बन्द रहने सङ्घका जिल्ला अध्यक्ष सुनिल महतोले जानकारी दिनुभयो । बजार बन्द भएपछि बजारमा चहलपहल कम भएको छ ।
बुधबार राति होटल विशालमा प्रहरी सादा पोसाकमा छापा मार्न गएपछि विवाद भएको थियो । छापा मार्न नदिइएपछि भएको विवादपछि आक्रोशित प्रहरीले होटलका सञ्चालक सुनिल साह, होटल मालिक तथा सङ्घका पूर्व जिल्लाअध्यक्ष निरस चौधरी र  निर्माण व्यवसायी सङ्घका जिल्ला अध्यक्ष विशाल साहलाई  कुटपिट गरेको व्यवसायीको आरोप छ । सिरहाका प्रहरी प्रमुख राजेशलाल कर्णले अपराधी होटलमा वास बसेको सुराक पाएपछि छापा मार्न पठाइएका प्रहरीमाथि नै होटल सञ्चालकले पहिले आक्रमण गरेको आरोप लगाउनुभयो । उहाँका अनुसार, होटलअगाडिबाट ज२प ९००५ नम्बरको बेवारिसे मोटरसाइकलसमेत बरामद भएको छ र अपराधीलाई होटल सञ्चालक नै भगाएको छ ।